Dy kushërinjtë Gazzment dhe Roel Sulçaj janë vënë në prangat e Policisë së Vlorës, pasi iu është gjetur një sasi e konsiderueshme e farave të kanabisit, të cilat dyshohet se do të përdoreshin për t’u mbjellë nga persona të tjerë.
Policia njofton se gjatë një kontrolli në mjetin në pronësi të Roel Sulçajt, që në ato momente drejtohej nga Gazmenti, janë gjetur dhe sekuestruar 2632 fara të dyshuara narkotike cannabis sativa.
Njoftimi i Policisë:
Vijon puna për parandalimin, evidentimin dhe goditjen e veprimtarisë kriminale në fushën e narkotikëve. Goditet nga Seksioni për Hetimin e Narkotikëve në DVP Vlorë, një rast i tentativës për kultivim të bimëve narkotike. Sekuestrohen fara kanabisi, arrestohen në flagrancë 2 shtetas.
Në vijim të goditjeve të njëpasnjëshme ndaj veprimtarisë kriminale në fushën e narkotikëve, specialistët për Hetimin e Krimeve në Seksionin e Hetimit të Krimeve kundër Trafiqeve të Paligjshme dhe Narkotikëve, në bashkëpunim me Forcën Operacionale në DVP Vlorë, në bazë dhe të informacioneve të marra në rrugë operative, bënë të mundur kapjen dhe arrestimin në flagrancë të shtetasve:
G. S., 37 vjeç, banues në lagjen “24 Maji”, Vlorë; R. S., 19 vjeç, banues në lagjen “Uji i Ftohtë”, Vlorë. Këta shtetas dyshohet se në bashkëpunim me njëri-tjetrin siguronin farat e kanabisit për t’i shitur, me qëllim kultivimin e tyre.
Ditën e djeshme, në lagjen “10 Korriku”, në automjetin në pronësi të shtetasit R. S., që drejtohej nga shtetasi G. S., shërbimet e Policisë gjatë kontrollit gjetën dhe sekuestruan 2632 fara të dyshuara narkotike cannabis sativa.
Materialet i kaluan Prokurorisë pranë Gjykatës së Shkallës së Parë Vlorë, për veprën penale “Prodhimi dhe shitja e narkotikëve”, kryer në bashkëpunim.
