Kryeministri Edi Rama do të rikthehet në Budapest këtë të enjte me ftesë të homologut hungarez Viktor Orban. Hungaria mban presidencën e radhës së BE-së deri në fund të Dhjetorit. Ky shtet luajti një rol vendimtar për mbajtjen e Konferencës së Dytë Ndërqeveritare me Shqipërinë më 15 Tetor, që shënoi edhe hapjen faktike të shqyrtimit të kapitujve të parë të negociatave.
Tv Klan News ka arritur të zbardhë ftesën e Orban për kryeministrin shqiptar, për të marrë pjesë në samitin e Komunitetit Politik Evropian në Budapest, krahas mbi 50 liderëve të tjerë evropianë. Në qendër të këtij samiti, Orban ka vendosur luftën ndaj emigracionit të paligjshëm.
“Konfliktet dhe paqëndrueshmëria janë në rritje në Afrikë. Emigrimi i parregullt dhe instrumentalizimi i tij përbën një sfidë shtesë për Evropën. Ne do të diskutojmë mbi sfidat e sigurisë, të ndjekura nga katër sesione kryesore mbi temat e emigracionit dhe sigurisë ekonomike. Sesioni për emigracionin do të përfshijë të gjitha aspektet në luftën ndaj tij”.
Orban ka mbështetur publikisht paktin Rama-Meloni për kampet e azilkërkuesve në vendin tonë. Sipas tij pa ngritjen e kampeve te menaxhimit të kërkesave për azil jashtë BE-së nuk mund të ndalet emigrimi i paligjshëm. Të gjitha zgjidhjet e tjera janë, për kryeministrin hungarez janë një iluzion.
Klan News
