Një ngjarje e rëndë është shënuar sot në Vaun e Dejës.
Policia bën me dije se rreth orës 03:00 të mëngjesit të sotëm 37-vjeçari Alfons Palushani ka qëlluar për vdekje me armë zjarri shtetasin Agron Metushi, 51 vjeç.
Mësohet se gjithçka nisi pas një sherri në lokal, ku autori pasi kanë dalë prej aty ka shkuar në shtëpi për të marrë armën dhe e ka qëlluar Metushin kur ky i fundit hipi në makinë.
Policia ka nisur kontrollet për arrestimin e autorit të ngjarjes së rëndë.
Njoftimi i policisë
Më datë 23.08.2022, rreth orës 03:00, në fshatin Shelqet, Vau i Dejës, pas një konflikti për motive të dobëta, dyshohet se shtetasi A.P., 37 vjeç, banues në fshatin Stajkë, Vau i Dejës, ka vrarë me armë zjarri shtetasin A. M., 51 vjeç, banues në Shkodër.
Nga veprimet e shpejta dhe hetimet paraprake të kryera nga Policia, dyshohet se konflikti për motive të dobëta ka nisur në lokalin e fshatit dhe menjëherë shtetasi A.P., ka shkuar në banesë ka marrë armën e zjarrit kallashnikov dhe në momentin që shtetasi A.M. ka hipur në automjetin e tij për tu larguar shtetasi A.P. e ka qëlluar me armë zjarri.
Grupi hetimor nën drejtimin e Prokurorisë vijon punën në vendngjarje për sqarimin e plotë të rrethanave dhe dokumentimin ligjor të kësaj ngjarjeje.
Shërbimet e Policisë janë vënë në ndjekje të autorit dhe vijon kontrolli i zonës për kapjen e tij.
