Prokuroria Speciale ka reaguar për një dokument që u shpërnda sot në media, se SPAK kishte lëshuar një urdhër të posaçëm për gazetarët, se nëse do të nxirrnin të dhëna që përbënin sekret hetimor do përballen me ligjin.
Kjo shkresë nxiti reagime të shumta sot, mes vetë gazetarëve por dhe nga politika. Këto reagime kanë bërë që SPAK të dalë me një sqarim zyrtar, duke bërë me dije se shkresa i është dërguar personalisht vetëm një gazetari. Pra sipas organit të akuzës, nuk është urdhër për median, por vetëm për një gazetar që ka nxjerr dëshminë e Nuredin Dumanit.
Ndërkohë, në dokumentin zyrtar bëhet me dije se vetë Prokuroria Speciale ka nisur hetimet mes radhëve të saj për të gjetur personin që ka dhënë dëshminë e të penduarit të drejtësisë, dhe si është shpërndarë ajo më vonë në persona të tjerë.
“Prokuroria e Posaçme Kundër Korrupsionit dhe Krimit të Organizuar, po kryen te gjitha veprimet hetimore të nevojshme për të sqaruar rrethanat në të cilat informacioni hetimor sekret është transmetuar tek personat që më pas e kanë publikuar atë, me qëllim vënien përpara përgjegjësisë të personit/personave që ka/kanë nxjerrë sekretin hetimor.
Ne mirëkuptojmë interesin e mediave për informimin e opinionit publik, por ky interes nuk mund dhe nuk duhet të cënojë një hetim të filluar dhe as sigurinë publike apo individuale të personave emrat e të cilëve janë përmenduar gjatë hetimit, i cili vazhdon”, thuhet ndër të tjera në reagimin e Prokurorisë Speciale, përcjell newsbomb.al.
NJOFTIM PËR SHTYP – SPAK
Nisur nga interpretimet e bëra në media, lidhur me urdhërin e prokurorëve të Prokurorisë së Posaçme Kundër Korrupsionit dhe Krimit të Organizuar, datë 14.06.2022 “Për ruajtjen e sekretit, ndalimin e publikimit të akteve dhe përmbajtjes së tyre’’ sqarojmë se;
Ky urdhër i është komunikuar në datën 16.06.2022 gazetarit E.Q, kundrejt nënshkrimit për marrjen dijeni, pasi gazetari ka publikuar disa te dhëna sekrete, që shkonin përtej vendimit të gjykatës me objekt caktimin e masave të sigurimit personal ‘’arrest në burg’, në kuadër të procedimit penal nr.75/2022 dhe që në përputhje me nenin 295/a/4 të Kodit Penal përbëjnë akte sekrete të procedimit penal nr.75/2022.
Sqarojmë se Prokuroria e Posaçme Kundër Korrupsionit dhe Krimit të Organizuar, këtë urdhër ia ka adresuar vetëm një gazetari dhe për arsyen konkrete të sipërcituar.
Prokuroria e Posaçme Kundër Korrupsionit dhe Krimit të Organizuar, po kryen te gjitha veprimet hetimore të nevojshme për të sqaruar rrethanat në të cilat informacioni hetimor sekret është transmetuar tek personat që më pas e kanë publikuar atë, me qëllim vënien përpara përgjegjësisë të personit/personave që ka/kanë nxjerrë sekretin hetimor.
Ne mirëkuptojmë interesin e mediave për informimin e opinionit publik, por ky interes nuk mund dhe nuk duhet të cënojë një hetim të filluar dhe as sigurinë publike apo individuale të personave emrat e të cilëve janë përmenduar gjatë hetimit, i cili vazhdon.
