Të gjitha fluturimet e disa prej kompanive të mëdha ajrore amerikane si Delta, United dhe American Airlines, janë anuluar mëngjesin e së premtes për shkak të problemeve të rrjetit të komunikimit, kanë bërë të ditur autoritetet amerikane të Aviacionit.
Fluturimet e këtyre kompanive, pavarësisht destinacioneve, janë anuluar të gjitha. Është e paqartë sesa do të zgjasë ky problem që ka prekur me mijëra pasagjerë.
Ndërkohë, BBC raporton se përpos kompanive ajrore, probleme me rrjetet e komunikimit po raportojnë edhe një sërë bankash dhe kompanish mediatike nëpër botë.
Avionët janë ulur në pista në aeroportin e Sydney-t, ndërsa probleme ka raportuar edhe platforma e grupit të bursës së Londrës.
Linja europiane Ryanair raporton gjithashtu probleme përgjatë gjithë rrjetit të saj, për të cilat thotë se janë përgjegjëse probleme në palë të treta.
Kompania këshilloi udhëtarët që kanë të planifikuara udhëtime për ditën e sotme që të kontrollojnë aplikacionin e Ryanair për përditësime rreth fluturimit të tyre.
