Kina u kërkoi Shteteve të Bashkuara që të “anulojnë menjëherë” tarifat e reja të shpallura nga Presidenti Donald Trump, të cilat janë veçanërisht të larta për produktet e saj, duke u zotuar se do të marrë kundërmasa për të mbrojtur “të drejtat dhe interesat e vendit” .
Barra është astronomike për gjigantin aziatik, pasi ai ishte në shënjestër të taksave të reja 34% mbi eksportet e tij në SHBA, përveç doganave të zbatuara tashmë nga Donald Trump .
“Kina i kërkon SHBA-së që të anulojë menjëherë detyrimet doganore të njëanshme dhe të zgjidhë siç duhet mosmarrëveshjet me partnerët e saj tregtarë përmes dialogut të barabartë”, u përgjigj Ministria Kineze e Tregtisë.
Ky sulm me karakteristika të proteksionizmit nga Shtëpia e Bardhë, i paprecedentë që nga vitet 1930, vë në rrezik “rritje ekonomike globale” dhe kërcënon zinxhirët e furnizimit ndërkombëtar, madje duke pasur ndikim në interesat amerikane, sipas ministrisë kineze.
Këto detyrime doganore “nuk respektojnë rregullat e tregtisë ndërkombëtare dhe dëmtojnë seriozisht të drejtat dhe interesat e palëve të interesuara”, denoncoi gjithashtu Ministria Kineze e Tregtisë, duke u zotuar të marrë kundërmasa.
“Nuk ka asnjë fitues në një luftë tregtare dhe asnjë rrugëdalje nga proteksionizmi,” vuri në dukje gjithashtu Ministria e Tregtisë e Kinës në deklaratën e saj.
Pekini denoncoi gjithashtu tarifat prej 25 % të SHBA në sektorin e automobilave, duke i quajtur ato masa “frikësuese”.
Singapori, i frustruar nga tarifat, do të kërkojë negociata me SHBA-në
Singapori ka shprehur zhgënjim për goditjen me tarifat 10% të SHBA, pavarësisht se vendi i pasur aziatik ka një marrëveshje të tregtisë së lirë dhe një deficit tregtar dypalësh me SHBA-në, tha të martën Ministri i Tregtisë i Singaporit, Gan Kim Yong.
Singapori mund të kishte marrë kundërmasa sipas marrëveshjes së tregtisë së lirë në fuqi që nga viti 2004, por ka zgjedhur të mos e bëjë këtë, tha ai gjatë një konference për shtyp.
“Këto tarifa thjesht do të rrisin koston e importeve tona”, tha ai, duke theksuar se qeveria do të rishikojë parashikimet e saj ekonomike për shkak të përkeqësimit të situatës.
