Për të fituar të drejtën e studimit në Arkitekturë a Urbanistikë nuk mjafton vetëm të kesh dorë të mirë në vizatime, të njohësh historinë e arkitekturës, por duhet të kesh edhe arsyetim të mirë logjik dhe kulturë të përgjithshme.
Të katër këta komponentë, ku dy të parat janë prirje të lindura që orientojnë maturantët drejt degës që duan, ndërsa dy të tjerat kërkojnë punë.
Prandaj, maturantët që e kanë ndarë mendjen dhe këmbëngulin fort të bëhen arkitektët e së ardhmes duhet t’i futen punës që tani për të fituar në konkursin e pranimit që organizohet nga Fakulteti i Arkitekturës.
Kjo është e vetmja gjë që mund të bëjnë ata në këto kushte, pasi pjesa tjetër për t’u pranuar në Arkitekturë a Urbanistikë lidhet me rezultatet e shkollës së mesme që ka edhe peshën kryesore të pikëve (60%).
Fakulteti ka hartuar kriteret e sivjetme për pranimet në 2021-2022 dhe formulën se si do të përllogariten pikët për të shpallur fituesit e rinj të vitit akademik që vjen (tabela përbri shkrimit).
Nuk ka ende një datë për konkursin, që do të zhvillohet në një ditë të vetme dhe zgjat për jo më shumë se tri orë. Testi ka në përmbajtjen e tij 60 pyetje me alternativa, në mënyrë që të mundësojë korrigjimin elektronik, rezultati i të cilit merret në kohë reale.
Testi i pranimit është i ndarë në katër pjesë dhe përmbledh pyetje që reflektojnë një seri cilësish të lidhura me arsyetimin logjik të kandidatit potencial për student në arkitekturë.
Pyetjet do të merren me raste ose probleme të bazuara në teste të eseve me natyrë shkencore ose abstrakte, zgjidhja e të cilës kërkon adoptimin e formave të ndryshme të arsyetimit logjik.
Ashtu sikundër ka edhe pyetje që kërkojnë të nxjerrin në pah dijet kulturore të kandidatëve që kanë të bëjnë me aktualitetin politik, social, kulturor, por dhe me koncepte e fenomene të së shkuarës.
Ka edhe një seksion pyetjesh konkrete që lidhen direkt me profilin ku kandidati do të studiojë, që rreken të kuptojnë nëse kandidati është i aftë të komunikojë grafikisht, të analizojë grafikë a vizatime. Pyetjet e kësaj pjese të testit do të bazohen në tekstin shkollor të teknologjisë, historisë së arit dhe historisë.
panorama
