Një autobus nga Kosova është aksidentuar në orët e para të mëngjesit në Salzburg të Austrisë. Siç shihet dhe nga pamjet që sjellin mediat vendase, autobusi i linjës “Armend Tours” ka dalë në krahun e kundër të lëvizjes dhe është përplasur me trafikndarësen.
Sipas mediave austriake, nga ky aksident kanë mbetur të lënduar 20 persona nga 28 udhëtarë që ishin gjithsej në të. Ata raportohet se janë të gjithë shqiptarë të Kosovës. Tre nga pasagjerët janë të lënduar rëndë.
Zëdhënësi i Policisë, Hans Wolfgruber, dyshimet janë se ose shoferin e ka zënë gjumi ose ndonjë defekt teknik e ka shkaktuar aksidentin. Komandanti i Shpëtimit të Qarkut, Hermann Garstragser, tha se në autobus ndodheshin 28 persona.
“Në automjet ishin 28 persona,” është shprehur ai, duke treguar dhe gjendjen e të lënduarve “tre kanë mbetur me lëndime të rënda dhe 16 kanë pësuar lëndime të lehta.” Garstragser tha se personat që ndodheshin në autobus janë turistë nga Kosova.
Një kontigjent i madh ndihmësish janë dërguar në vendin e aksidentit. Brigadat e zjarrit Hallwang dhe Eugendorf shkuan me rreth 60 vullnetarë në tetë automjete dhe Kryqi i Kuq mbërriti me rreth 50 ndihmës.
Midis tyre ishin tre ekipe mjekësore të urgjencës, madje një u kërkua nga Freilassing. Përveç kësaj, 12 automjete shpëtimi nga Flachgau dhe katër nga Austria e Epërme u vendosën në autostradë.
Veçanërisht problematike për shërbimet e urgjencës ishte fakti që fillimisht kishin probleme të mëdha për të arritur në vendin e aksidentit për shkak të punimeve në të. Autostrada më në fund duhej të mbyllej në të dy drejtimet, siç njoftoi kreu i zjarrfikësve, Christian Putz.
Fillimisht e vetmja mënyrë për të mbërritur në vendin e aksidentit ishte në këmbë. Aksidenti ka ndodhur rreth orës 03.00 të mëngjesit të kësaj të enjteje.
Autostrada është dashur të mbyllet edhe gjatë mëngjesit për shkak të nevojës për pastrim në vendin e ngjarjes. Rezultati shkaktoi vonesa të konsiderueshme në trafik, raportojnë mediat austriake.
