Finalizohet operacioni policor “Basti i fundit” në qytetit e Kurbinit për të parandaluar veprimtarinë e paligjshme të lojrave të fatit. . Policia e Kurbinit bën me dije se gjatë kontrolleve për parandalimin e aktiviteteve të paligjshme të lojërave të fatit, janë sekuestruar 8 kompjuterë.
Në kërkim është shpallur poseduesi i këtyre kompjuterëve dhe njëkohësisht pronari i lokalit, Arta Sula, i cili dyshohet se i përket grupit të Ervis Martinajt.
Gjatë 2 fazave të mëparshme të operacionit “Basti i fundit”, janë vënë në pranga 3 persona, si edhe janë proceduar penalisht 4 të tjerë. Sakaq, janë sekuestruar 13 kompjutera, 2 tavolina pokeri, 2 valixhe me çipsa, celularë dhe pajisje të tjera që shërbenin për organizimin e kundërligjshëm të lojërave të fatit.
Njoftimi i Policisë:
Kurbin/Finalizohet faza e tretë e operacionit policor të koduar “Basti i fundit”, kundër organizimit të kundërligjshëm të lojërave të fatit.
Si rezultat i kontrolleve, në një lokal në katin e parë të një pallati, gjenden dhe sekuestrohen 8 kompjutera që shërbenin për lojëra fati.
Identifikohet dhe shpallet në kërkim poseduesi i këtyre kompjuterave, njëkohësisht pronar i lokalit.
Shërbimet e Komisariatit të Policisë Kurbin, të mbështetura nga inteligjenca policore, si dhe në vijim të operacionit të koduar “Basti i fundit”, kanë ushtruar kontrolle në ambientet e një lokali jashtë funksionit, në katin e parë të një pallati në lagjen “Drita”, ku dyshohej se organizoheshin lojëra fati me kompjutera, në kundërshtim me ligjin.
Nga kontrollet, janë gjetur dhe sekuestruar në cilësinë e provës materiale, 8 kompjutera që shërbenin për këtë veprimtari të kundërligjshme.
Si rezultat i veprimeve hetimore për këtë rast, u identifikua dhe u shpall në kërkim poseduesi i dyshuar i këtyre pajisjeve, shtetasi A. S.(alias J. P.) 45 vjeç, banues në Mamurras, njëkohësisht, pronari i lokalit ku u gjetën kompjuterat. Vijon puna për lokalizimin dhe kapjen e tij.
Gjatë 2 fazave të mëparshme të operacionit “Basti i fundit”, janë vënë në pranga 3 shtetas, janë proceduar penalisht 4 shtetas, si dhe janë sekuestruar 13 kompjutera, 2 tavolina pokeri, 2 valixhe me çipsa, celularë dhe pajisje të tjera që shërbenin për organizimin e kundërligjshëm të lojërave të fatit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme, për veprat penale “Organizimi ose ushtrimi i veprimtarive të lojërave të fatit në kundërshtim me ligjin” dhe “Vënia në dispozicion e lokaleve për lojëra të palejuara”.
